Nga: Edison Ypi
S’po ta var kush ? S’po t’i hedh syt njeri ? Të kanë lënë pas dore ? Nuk po ta vlerësojnë sa duhet diturinë, karakterin, zjarrin që të djeg në gjoks ?
Është padrejtësi e padurueshme. Duhet ndrequr urgjentisht.
Për të realizuar pretendimet që me të drejtë i ke, si dhe për të vënë në vend padrejtësitë që vuan pa asnjë shkak, koha më e përshtatëshme është muzgu.
Për të mos u bezdisur nga prezenca e ziliqarëve të shumtë që kujtojnë se të gjitha gjërat e bukura Zoti ua ka falur atyre ndërsa ty të ka dhuruar vetëm Noc Rrokun, zgjidh një vend intim, një vend larg vëmendjes së turmës. Pse jo banjën. Me veglat e banjës, zorrën, vaskën, rubinetin, briskun, sapunin, shkumën, peshqirin, dritaren prejnga duket Hëna, mund të bësh kompozime fotografike që ta çudisësh botën.
Përcakto pozicionin e kokës të atillë që drita të bjeri në pjesët më shprehëse të fytyrës prejnga të buçet zgjuarsia dhe gjenialitetet e tjera që i ke por keqdashësit dhe mosmirnjohësit padrejtësisht t’i mohojnë.
Merr celularin, zgjate dorën, shkrepe bombën.
Bëre një Selfie.
Pra bëre një banalitet. Por ngushëllohu. Mbahu. Mos qaj. Nuk je i vetmi apo e vetmja që bën gjëra të padobishme. Gomerë si ty bota ka me miliona.
Mund të ndodhi që selfia që sapo bëre nuk të pëlqeu.
E çfarë se nuk doli mirë Selfia. Vaska e bardhë, zorra e zezë, bideja prej mermeri, dushi i ngrohtë, brisku i mprehtë, sapuni i butë, shkuma rrëshqitëse, luna mendimtare, aty janë. Bëj një tjetër selfie. Nëse edhe tjetra selfia nuk do të pëlqejë, bëj edhe nja 20 ose 30 selfie të tjera. Ndonjë mik ose mikeshë ziliqare mund të mos i pëlqejë selfiet e tua. As për këtë mos u merakos. Ndërkohë që ti bën selfiet e tua në banjën tënde, me mijëra të tjerë po bëjnë selfiet e tyre në halet e tyre, më për ibret se selfiet e tua. Mos humb kohë. Pa dalë nga banja nisi urgjent selfiet në të gjitha rrjetat sociale.
Selfia e banjës nuk është e vetmja. Ka plot selfie të tjera. Për shembull, selfia që bën budallai me dorën në mjekërr kur çfaqet i menduar sikur ka mbi supe hallet e botës. Kjo Selfie quhet Selfqirje, që rrjedh nga fjala greke “qirje” që do të thotë “zotni”. Selfia që bëhet para pasqyrës quhet Selfpjerdhje.
Një tjetër Selfie goxha e përhapur është ajo kur një tufë hajvanësh bëjnë fotografi me të ngrëna përpara; verë, birra, bërxolla. Selfie më shtazarake se kjo përmes së cilës hajvanët e pangopur dëshmojnë urinë e etërve, nuk ka. Selfia me të ngrëna mbi tavolinë quhet Sumtyryxhym.