Gazetarja, nuk e pyet Monën se me çfarë parash e ndërtoi vilën, por e pyet se cila nga 11 banjot është e maces!

Nga Adriatik Doçi

Kjo skenë krimi është një nga fytyrat e korrupsionit dhe pastrimit të parave të pista nga Ilir Meta dhe Monika Kryemadhi. Është gjithashtu një nga kulmet më të turpshme të degardimit të gazetarisë në Shqipëri.

Gazetarja, nëse mund ta quajmë të tillë, nuk e pyet Monën se me çfarë parash e ndërtoi vilën, por e pyet se cila nga 11 tualetet është e maces!

Ilir Meta, i cili ka hyrë në politikë me një Golf2 dhe çerek apartamenti parafabrikat, e zhduku me shpejtësi reportazhin.

Po cila është e vërteta e vilës?

Historia duket si përrallë. Fillimisht, në vitin 2007, Monika Kryemadhi ka blerë 500 m2 tokë me 5 milionë lekë. Paratë i ka nxjerrë nga një tjetër histori pastrimi parash. 700 m2 tokë ia ka falë vëllai. Ja ku u bënë 1200 m2 tokë.

Në vitin 2008 lidh një kontratë me Gentian Sulën për ndërtimin e një pallati. Mona nuk do ta fusë dorën në xhep, por do të përfitojë 35% të sipërfaqes së pallatit që do ndërtojë Sula me shpenzimet e tij. Dhe ashtu u bë.

Në vitin 2010, Monika shkëmben 300 m2 sipërfaqe ndërtimore të pallatit me vilën në Gjirin e Lalëzit. Ndërkohë që vijon të shesë apartamente në pallat me vlerë mbi 1 milionë euro. Ju e dini se një vilë në Gjirin e Lalzit, sipas tregut imobilar, ka një vlerë rreth 5 milionë euro.

Palmat, mobiljet luksoze, deri tek vaskat e floririt, e bëjnë vilën e Metës dhe Monikës të tejkalojë disa herë vlerën e pallatit.

Kjo është vetëm një degë e pasurimit magjepës.

Në vitin 2003, Meta blen një vilë në Golem për 60 mijë USD. Paratë gjoja i merr kredi. Në 2006 e shet për 300 mijë euro. Dy janë rrugët: Ose nuk ka deklaruar vlerën reale në 2003 ose i ka rritur fiktivisht vlerën në 2006. Nuk ka asnjë mundësi që vlera e një pasurie të rritet me 500 % gjatë tre viteve!

Nga shuma prej 300 mijë euro, me 50 mijë euro shlyen gjoja kredinë 60 mijë USD dhe me 5 milionë lekë ble blen tokën në Laprakë ku bëri pallatin.

Me diferencën 200 mijë euro që i mbetet, i shton edhe një gjoja kredi 200 mijë euro dhe blen apartament 400 mijë euro. Kredinë 200 mijë euro e shlyen me shitjen e dy apartamenteve tek pallati.

Kështu, si në përralla, pa futur dorën në xhep, Meta dhe Monika u bënë të pasur!

Deri ditën kur SPAK të flasë për këtë mozaik korrupsioni, pastrimi parash, falsifikimi dhe mashtrim banal me pasurinë, në Shqipëri nuk ka shtet ligjor, nuk ka barazi para ligjit, nuk ka fund të pandëshkueshmërisë, nuk ka drejtësi dhe integrim në BE.

Leave a Comment